breaking

BINISAYA: Mga bakwit gitabangan sa feeding project ni Fr. Casas

person access_timeSunday, March 21, 2021 chat_bubble_outline0 comment

MALAYBALAY CITY (20 Marso 2021/BukidnonNews.Net) Mga internally-displaced persons (IDPs) kon bakwit nga midangop sa San Fernando ang natabangan  sa food distribution project nga gipangunahan ni Fr. Conrad Casas Jr, kura paroko sa San Fernando Parish.

Matud pa niya ngadto sa BukidnonNews.Net, adunay mga IDP’s tungod sa ‘all out war’ batok sa New People’s Army.

“Ang mga lumad sa lasang ang pinaka-unang naapektahan, Gikan sila sa Davao ug Agusan mibakwit hangtud nga nakaabot sa maong dapit,” dugang paniya.

Ang tahas

Mokabat 5,000 ka tawo o 1,268 ka pamilya ang iyang pakan-on sa gipahigayong feeding program kada bulan. Nahimotang ang mga bakwit sa mokabat 11 ka lumad communities apil ang mga mosunod:  Sitio Salumayag ug Kasilaan, sa Brgy. Halapitan; Sitio Lukak, Sitio Sil-angon, Sitio Nabangkal ug Sitio Salingoton, sa Brgy. Magkalungay; ug Sitio Natampud, Sitio Durian, Sitio Butay ug Sitio Uling, sa Brgy. Namnam.

“Moundang pa ang tubig kumpara sa giyera sa maong dapit,” matud pa sa Katolikanhong pari.

Gipaklaro ni Fr. Casas nga puro “charity” kon “humanitarian” ang ilang gibuhat kay walay bisan usa nga Katoliko sa maong mga bakwit. Dugang paniya kadaghanan sa ilaha miyembro sa laing mga sekta kon relihiyon.

Kaniadtong Abril 1, 2020 pa nagsugod ang maong kalihokan sa parokya pinaagi sa pag apod-apod og mga food packs panahon sa lockdown dala sa COVID-19 pandemic. 

Karon miabot na sa ika-47 ka hugna nga feeding activity ang napasiugda sa maong proyekto. Sinemana ang pagpasiugda sa feeding, sa lahi nga dapit matag Miyerkules. Lahi pa ang ginapasiugda nga feeding sa usa ka komunidad nga personal nga misyon ni Fr. Casas, apil pa ang gaipakaon sa mga mobisita sa kumbento.

Ang tinubdan
Matud pa ni Fr. Casas gikan sa mga donasyon ang gigamit pangpalit sa mga pagkaon.  Mokabat P50,000 hangtud P60,000 matag semana ang budget para  sa feeding project. Mohurot og tulo ka sakong bugas sa paniudto lang ug walay labot pa ang ihatag nga bugas sa matag pamilya. Lutoon nila daan sa kumbento ang mga pagkaon ug dalhon ang mga naluto na sa bukid.

Matud pa niya, gapadayon hangtud karon ang proyekto kay daghan nga mga pamilya, individuals, ug organizations ang mitabang. Dugang pa niya, naay usa ka tawo nga gahatag og P20,000 kada semana para sa pagkaon.

Ang Provincial Social Welfare and Development Office (PSWDO) sa Bukidnon mihatag sab og bugas, canned goods, gatas, kape, ug noodles. Si Fr. Casas na lang sad ang mangita kung asa siya makakuha og asin, asukar ug bulad.

Nakatabang usab ang mga lumilihok sa parokya, matud pa niya. Ang mga alagad sa parokya ang lumilihok sa kusina (Team Luto), mga katekista ang sa rekados (Team Gutad), ang mga sacristan ug mga sakop sa Youth Apostolate ang packaging (Team Repack). Matud pa niya, ang kura paroko pod ang tig-organize, tig-kumpra ug tig-tapal.

Sa ilang bahin, ang mga lumad modala og mga lagotmon sama sa Kamote og mga sugnod isip counterpart. 

Ang mga hagit
Gisaysay usab ni Fr. Casas ang ilang kaagi aron mahatod ang mga pagkaon sa hingtongdan nga mga katawhan. Isakay sa mga ‘skylab’ o habalhabal nga motor, itabok og suba, ug usahay mokamas pa sa lapok nga dalan ang maong mga salakyan dala ang mga binalde ug nakakaldero nga pagkaon. Sa ika-47 ka hugna nga feeding project matud pa sa pari nga samtang nagpakaon sila adunay ga-giyera sad sa pikas bukid.

Sa pagsugod niya sa feeding program, gisaysay ni Fr. Casas nga gibati siya og kulba kay dili mailhan kung si kinsa nga grupo ang nag-engkwentro sa maong dapit gumikan kay dili lang Philippine Army, kapolisan og NPA ang naa sa maong dapit, daghang pang laing armadong grupo.

Giangkon ni Fr. Casas nga ang iyang matabang “band-aid” remedy lamang sa problema sa kagubot, apan, matud pa niya sa iyang mensahe sa BukindonNews.Net, “nakatutok sa apektado”.

“Ang akong gitabang sa ilaha (mga bakwit), pinaka-basic nga kinahanglanon nga gaka-limtan na,” dugang pa niya isip paghulagway sa paghatag og pagkaon. 

Kanhi sa Kibangay, Lantapan na destino nga parokya si Fr. Casas. Sa gihapon, didto iyang gi bisita ang mga lumad communities og nagpasiugda og mga proyekto sama sa feeding. Gi-hire usab niya ang mga kabataan nga nakahuman sa kursong edukasyon nga magtudlo sa mga lumad gamit ang Binukid nga pinulongan. Sa una, gitudlo lang sa mga lumad ang pagbasa ug pagsulat. Ang resulta, nabansay ang mga tinun-an aron maka botar og tarong panahon sa eleksyon.

Karon, mikabat na sa unom ka mga komunidad niya gipahigayon ang food distribution ug paghatag og school supplies alang sa 200 ka mga bata sa Kibangay. (Uban ang taho ni correspondent Sean Sulugan, BukidnonNews.Net)

UNANG LITRATO: Midagsa ang mga tawo sa adlaw sa pagapod-apod og pagkaon didto sa Brgy. Namnam, San Fernando, Bukidnon. Tanang litrato gitugtang gamiton gikan sa Facebook Account ni Fr. Conrado Casas' Facebook account  

Mikuha sa ilang paniudto ang isa ka inahan kugos ang iyang anak didto sa pagapod-apod og pagkaon sa Brgy. Magkalungay, San Fernando, Bukidnon.

Mikuha sa ilang paniudto ang isa ka inahan kugos ang iyang anak didto sa pagapod-apod og pagkaon sa Brgy. Magkalungay, San Fernando, Bukidnon.

Mi-linya pod sa ilang bahin sa ice cream ang mga hamtong nga lumolupyo sa usa ka sitio sa Brgy. Namnam, San Fernando, Bukidnon.

Mi-linya pod sa ilang bahin sa ice cream ang mga hamtong nga lumolupyo sa usa ka sitio sa Brgy. Namnam, San Fernando, Bukidnon.

PAHULAY: Mipahulay ang mga drayber sa habal-habal nga nagdala sa mga pagkaon para i-apod-apod didto sa usa ka sitio sa Brgy. Namnam, San Fernando, Bukidnon

PAHULAY: Mipahulay ang mga drayber sa habal-habal nga nagdala sa mga pagkaon para i-apod-apod didto sa usa ka sitio sa Brgy. Namnam, San Fernando, Bukidnon

folder_openAssigned tags
content_copyCategorized under
shareShare article