breaking

BINISAYA: Maayong pagpanaw, Fr. Diomedes “Jojo” Brigoli

person access_timeTuesday, May 04, 2021 chat_bubble_outline0 comment


MALAYBALAY CITY (BukidnonNews.Net/Mayo 3, 2021) Gilubong karong adlawa, Mayo 3, si Fr.Diomedes “Jojo” Brigoli sa Catholic Cemetery ning dakbayan.

Ang iyang pamilya ra ug pipila ka mga pari ang mitambong sa iyang lubong kay wala gitugotan ang mga parokyano gikan pa didto sa iyang haya sa DFC-1 sa nakalabayng Domingo.

Kahinumdoman nga namatay si Fr.Brigoli kaniadtong Mayo 1 sa gabie gumikan sa kumplikasyon sa COVID-19 (basaha ang konektadong balita).

Gisaysay sa iyang pagumangkon nga si Ezramie Eun Brigoli ang kaagi sa iyang uyuan sa pakigbatok sa COVID, pinaagi sa iyang post sa Facebook. Ipatik diri ang maong chronology, uban sa pagtugot ni Ezramie.

April 14 - 1am sa vigil ni Fr Joel (Tuquib) sa Baungon nag binuang kag storya sa alagad na "wala ta kabalo kun kinsay sunod mamatay ako ba or ikaw" sa pag ka dungog nako ato mura kog nakuyawan.

April 20 - During sa imong priesthood (anniversary) mass daghan natingala nganong ga hilak ka sa imong homily. Nga sa pila ka misa pa salamat nimo sa pagka pari ayha pagyud mi kakita nga nihilak ka. Unya during sa bonding uban sa imong mga barkada naay nangutana kun kinsa kahay musunod kang Fr. Tuquib unya mu binuang napud kag tubag nga "BASIN AKO".

April 23 -  5:30 pm kabalo gyud ko kana nga panahon grabi imong kabalaka kay naapil ka sa lista sa gipang trace kay lagi secondary contact ka.. Looy kaayo ka lantawon nga ga inusara ra ga kaon kay naka isolate ka.

April 24 - Kalit lang ka nag luya kay siguro tungod sa stress. Unya ni request kag toub maong gi toub ka namo ni Kuya Bart.

April 25 -  Medjo ok na imo paminaw ni balik nakag tambay sa balcon which is your favorite tambayan.

April 26 – Gakurog-kurog naka mao gi pugos ka namog pa check up. Kampante na kaayo mi nga ubo ra gyu imo gibati kay ok raman imong mga laboratory result sa Capitol University at 1a.m. naka gawas nata sa ospital.

April 27 -  Ok pa kaayo ka hangtod sa Abril 28 happy ka kay negative ang result sa alagad.

April 29 - 6:30 a.m. ni adto nakag simbahan kay gusto na kaayo ka mu misa balik pero taman raka sa sacristy kay kalit napud ka gahangos ug gapangurog mao tong gitabang ka.

9am ni ingon ka nga abi nimog kaya na nimo mag misa.. Sige mi ug haplas2x sige pud mi hangyo nga mag pa ospital naka pero dli gyud ka gusto until 12noon nga grabi na imong pangurog mao tong sa last nga hangyo namo nga mag pa hospital ka nisugot na gyud ka.

While travelling paingon Maria Reyna (Hospital) grabi na imong hangos galisod nakag ginhawa milagro ragyud among gipangayo ato nga maabot tag hospital nga ok paka.

Pag abot didto kalit lang ka nga dli na masabot imo storya..4pm gi ingnan mi sa doctor nga 60% nalang imong chance pero wala gyud mi nawad-an ug pag laom. Until 3am ni stable imong oxygen level grabi among kalipay kay na ningkamot jud ka.

April 30 -  5p.m. gi ingnan mi sa doctor sa Maria Reyna kay e-refer ka sa NMMC kay nikalit napud nga ni kritikal ka. Katong i balhin naka sa ICU gi ingnan paka ni Kuya Titing nga maningkamot kay ma ok ra ang tanan. Ga tango2x pud ka.

May 1 - Naka receive mig text (SMS) nga imong condition “so far so good.” Grabi among kalipay.

Nga nag expect najud mi nga after sa among 14 days quarantine mag uli mi sa kumbento nga naa ka.

Until 8:15pm gikalit lang kag declare nga patay na.

KOL (Uncle) lisod kaayo dawaton nga sa imong kamatayon nag inusara ka. Nganong na timing paman jud kun kanusa mi gipa-surrender for quarantine ayha pud ka nibiya sa amo. Sakit kaayo kay pag biya namo nakita pa namo nga gapa ningkamot ka. Pero karun maskin sa abo nalang unta makita ka namo for the last time.

Pero wala mi mabuhat kay wala pa naabot among swab result. Kol uii pwerting sakita sage pa naku mahuna-hunaan tong mga panahon nga galuya ka nga atimanon ka namo trapo-trapohan, ilisan pisil-pisilon sige pami hangyo nga paningkamot kol ma ok ra lagi ni.

Kol sa 13 yrs nako nga pag uban sa imo nahimo na taka nga ika duha nga amahan daku kaayo ako pasalamat sa imo. Mingawon jud ko nimo kol lisod kaayo dawaton kabalo gyud ka kol kun unsa ka namo ka love.”

Sulod sa 28 ka tuig nga pagkapari ni Fr.Brigoli sa Diocese sa Malaybalay matud ni Esra Eun kini nga mga parokya siya na-assign; San Isidro Labrador Parish sa Kadingilan;San Isidro Labrador Parish,Masimag,Pangantucan,Bukidnon; San Isidro Labrador Parish sa Baungon,Bukidnon; St.Joseph Parish sa Talakag,Bukidnon; San Agustin Parish sa Valencia City,Bukidnon ug ang pinakaulahi mao ang Jesus Nazareno Parish sa Crossing,Libona,Bukidnon. (Sean G.Sulugan/BukidnonNews.Net correspondent)

LITRATO: Sa lubong ni Fr. Diomedes "Jojo" Brigoli kaniadtong Mayo 3, 2021 didto sa Malaybalay Catholic Cemetery/Gikan sa FB post ni Fr. Conrado "Bom-bom" Casas 

content_copyCategorized under
shareShare article