[BINISAYA] Daghang satellite registration sites gipanawagan sa 3 ka presidente sa Ateneo

DAKBAYAN SA CAGAYAN DE ORO (BukidnonNews.Net/22 Oktobre 2021) Ang Mindanao Consortium of Ateneos misulat og hangyo sa Commission on Elections (Comelec) nga daghanan pa ang mga satellite center sa nagapadayon nga voters registration hangtud sa Oktubre 30,2021.

Gipresentahan sa tulo ka mga presidente sa Ateneo ang consortium nga sila si Fr.Joel Tabora, S.J sa Ateneo de Davao; Fr.Karel San Juan,SJ sa Ateneo de Zamboanga; ug Fr. Mars Tan sa Ateneo de Cagayan.

Subay sa ilang gipagawas nga joint statement, sa 2019 moabot sa 61,843,750 ang nakarehistro nga makabotar. Human sa paglimpyo sa database, naa na lang sa 54,843,750 ang nabilin.

Sa record sa Philippine Statistics Authority (PSA),dunay current population ang mga kabatan-onan nga nag-edad og 18 hangtud sa 24 anyos nga 19,496,400 ug naa lang sa 11,117,820 ang nakarehistro. Dunay 8,378,580 pa ka mga batan-on nga kwalipikado ang wala pa nakarehistro.

Miduso ang consortium sa ilang mga rekomendasyon sa Comelec.

Una,nga i-release sa Comelec ang 2022 election guidelines sa dili pa ang voters deadline.

Ikaduha, gidasig nila ang mga batan-on nga magparehistro ug gidasig sad nila ang tanan nga tabangan ang mga batan-on aron magparehistro.

Gihangyo sad nila ang Comelec nga i-prayoridad ang mga batan-on ilabina kadtong mga out of school youth nga mga first time voters.

Panglantaw sad nila nga sa panahon sa election period, palig-onon nila ang political education.

Andam sila nga ipagamit ang mga eskwelahan sa Ateneo nga himoong voters registration sites.

Samtang gusto masayran ni Fr. Tabora sa mga kandidato sa pagka-presidente kung unsa ang ilang mga baroganan sa isyu sa Mindanao sama sa peace process sa Mindanao tali sa Muslim, lumad ug Christian, isyu sa CPP-NPA-NDF, extremism sa Mindanao, culture of dialogue ug proteksyon sa kinaiyahan ilabina sa Philippine Mining Act of 1992. (Sean G.Sulugan/BukidnonNews.Net correspondent)