[BINISAYA] 15 ka oras nga driving course, gikinahanglan ayha makakuha og student permit - LTO-10

CAGAYAN DE ORO CITY (BukidnonNews.Net/Abril 25, 2021) Gikinahanglan na sa Land Transportation Office (LTO)-10 nga makahuman og kinse ka oras o tulo ka adlaw nga driving course ang gusto makakuha og student permit (SP), ang pasiunang pagtugot bag-o ang driver’s license.

Kini ang pahayag ni LTO-10 director Nelson Manaloto sa gipahigayong senemana nga Meet the Press diha sa Cagayan de Oro Press Club (COPC) kaniadtong Abril 21, 2021.

Matud ni Manaloto nga katuyoan niini nga masuta kon angayan ba gyud mahatagan og lisensya ang usa ka driver. Matud pa, sa katibuk-an tumong niini nga maubsan sad ang ihap sa vehicular accident.

Ang itudlo sa maong driving course mao ang traffic laws, traffic signs ug basic automotive.

Sa mga interesado nga makahibalo sa mga accredited driving schools, makita ang listahan sa Facebook page sa LTO-10.

Apan sa mga kabos nga mga drivers, adunay libre nga driving course sa Regional Office sa LTO-10 apan ang ipailalom pa sa assessment ang aplikante kung kwalipikado ba kini sa libreng kurso. 

Gitin-aw sad ni Information Officer sa LTO-10 Ferdinand Flores, sa pakighinabi sa BukidnonNews.Net, nga ang 15 ka oras nga driving course, theoretical lang apan dunay laing walo ka oras nga practical driving certificate nga kuhaon nimo sa mga private driving school.

Sa higayon nga makuha na sa aplikante ang practical driving certificate, ayha pa itunol sa LTO ang SP.

Plano sad nila nga motanyag og libre nga driving course sa mga probinsya nga sakop sa LTO-10 diin sa Malaybalay City ipahigayon ang sa lalawigan sa Bukidnon.

Dugang pagpatin-aw ni Flores nga ang libre nga driving course nga gitanyag sa LTO-10, theoretical lang, walay practical driving.

Samtang nunot sa gipahayag ni LTO director Manaloto nga na-aprubahan na ang Memorandum of Agreement (MOA) taliwala sa LTO ug sa Technical Education and Skills Development Authority (TESDA) kalabot sa driving course nga kung mag-eskwela ang usa ka driver sa TESDA, pwede magamit ang certification alang sa 15 ka oras nga driving course nga gi-pangita karon sa LTO.(Ni Sean Sulugan/BukidnonNews.Net/Correspondent)

SA HULAGWAY: Si LTO-10 director Nelson Manaloto (mikapot sa mikropono) sa gipahigayong senemana nga Meet the Press diha sa Cagayan de Oro Press Club (COPC) kaniadtong Abril 21, 2021.