people

BALAK: Mga Nalilian sa Kapin sa Tuig nga Urom

person access_timeSaturday, February 12, 2022 chat_bubble_outline0 comment

Ni Anijun Mudan-udan

Bisan ang mga wakwak nahadlok nga matakdan
Busa sa FB na lang manungod og mga buros
O kaha didto sa Twitter ug sa Instagram.
Maayo nang maneguro kaysa sa maataw-ataw
Kon masapnan nga molupad sa kada Biyernes
Kay mangitag tambal para sa baga nga ugam.

Natanggong sa balay ang daghang tagbalay
Kay nanirado ang mga tunghaan ug upisina
Ug sa internet ra puyde magtigomtigom. 
Bahala kuno kon daghan ang magmahaymahay
Kon way manambong sa haya ug sa lubong
O kaha sa pagsaulog sa adlawng natawhan.

Sigeg yawyaw sa istatus sa sosyal midya
Ang mga adunahan nga daghan og panahon
Nga manaway sa mga sigeg panggawas sa balay.
Samtang sigeg post kon unsay giorder sa Lazada
O kaha unsay gipa-deliver nga lamiang pagkaon
O kaha ang Tiktok sa igatan niyang pagsayaw.

Way kurat ang mga kabus sa pagbahasbahas
Tungod sa daghang mga tiyan ang nagbagulbol
Kay kulang ang kaduha ra nga kaon kada adlaw.
Pabagaayg dagway sa pangayog hinabang nga bugas
Kay ang mga kaldero magsige rag pangagulkol
Samtang mga batang gutom mamuti ang kalimutaw.

Gibaligya na sa gitarista ang iyang gitara
Aron ipalit og gatas alang sa iyang mga anak
Nga nagniwang na kay kulang kanunay ang sud-an.
Samtang naglurat na ang mata sa magsusulat
Sa padayong paghulathulat sa iyang royalty fee
Nga yawat na unta intawon ipalit og pidlayan.

Nanagbagulbol na ang daghang mga magtutudlo
Kay sila man ang nagkadiindiin sa pagtapal
Sa gastohon sa kompyuter, internet ug kurente.
Samtang ang mga ginikanan apil nga nangahago,
Isig-iyag bantay nga adunay bitbit nga bunal
Sa mga badlongon ug gahig ulo nga estudyante.

Sa laing bahin nanggula ang mga komyuniti pantry
Nga matod pa ang utok sa pagpasiugda mga komunista
Kay si Inday Patreng gikan man kuno sa UP Diliman.
Maorag wala pa mahuwasi sa binuntagay nga inom
Ang mipasangil nga upisyal sa mga sundalo
Nga nagtoong natukod na sab ang Diliman commune. 

Samtang kahikogon ang mga nawad-an nag paglaum
Nalipay ang Tsina sa pag-ihap sa dakong ganansya
Kay ang iyang bakuna gibayloag lamiang isda sa Spratlys.
Samtang ang way klarong ugma gihulga sa mga dag-um
Miburot ang tiyan sa dagkong kompanya sa pharma
Kay gipakyaw sa mga goberno ang ilang mahal nga bakuna.

Way puas ang inihapay sa linibo nga nagpositibo
Samtang komplikado ang estado sa mga nangaulian,
Ug si Kamatayon maorag nangin-udlot rag tangkong
Sa iyang way ulaw nga pagpangawat og mga kinabuhi
Atubangan sa kinakusgang mga tambal ug mga tambalanan
Nga gisaligan sa mga eksperto sa tibuok kalibotan.

Sulod sa mokapin og usa ka tuig na nga urom
Gihasi kita sa kakulba, kahadlok ug kalisang.
Apan di ta manuko og bagting sa atong kasingkasing
Aron molanog ang kinakusgang pitik sa paglaum
Hangtod nga moabot ang buntag sa atong pagkapukaw
Ug makaginhawa tag lawom, "Salamat kay buhi pa ko!"

(Ang “Mga Balak” isa ka seksyon sa BukidnonNews.Net nga tapokanan sa mga balak nga sinulat sa mga taga Bukidnon gikan sa hain mang dapit sa kalibotan. Si Anjiun Mudan Udan isa ka magsusulat og nobela. Editor siya sa seksyon sa literatura sa BukidnonNews.Net.)  


folder_openAssigned tags
content_copyCategorized under
shareShare article