LITERARY: Balak ni T.S. Sungkit Jr: Pamalandong

Matag karon ug unya

Akong mahunahuna

Nga duha ray paingnan

sa akong mga dalan.

Sa too o sa wala?

Mopili kuno kita.

Apan sukad sauna

Usa ray padulngan ta.

Ug kadto maoy hingpit

Nga tinubdan sa awit.

 

Hades o paraiso,

langit o impiyerno?

Nirvana? Kamaloka?

Ikapito o una?

Managlahi tag tubag

Asa uli ang kalag.

Matod sa daang tagna

Mouli tas himaya.

Matod sa bag-ong sugid

Depende kunos ligid.

 

Alang nako nga lumad

Aron way daghang labad

Ako ray padulngan ko.

Kay dili man mahimo

Nga moadto kos lain,

Duna unyay malain,

O masuko ba kaha

Sa akong pagpataka,

Nga luyos kinabuhi

Ang patay pirmeng buhi.

 

Pastilan, maypang langgam

Magsige lag pangigham.

Ug maypang mga sulom

Way kabalak-ang dag-um.

Di sama nakong buta

Ang ikatulong mata,

Maong duha ray bal-an

Mga tumong sa dalan.

Mao nga hangtod karon

Way hanaw lang gihapon. (Bukidnon News Literary Section)

(The Literary Section  is one of Bukidnon News’ newest sections to provide alternative avenue for Bukidnon’s home-grown creative writers. T.S. Sungkit Jr, is a novelist from the Higaonon tribe.  He writes and farms at the same time. He will edit this section as well as “Mga Ahong Ta Tagolwan,” which we launched last month. Send your contributions to  anijunmudanudan@yahoo.com. In the subject line, write: literary section.)