LITERARY: Hubad sa Binisaya – Balak ni Shem Linohon: “Payirwerks”*

Nanglupad na dayon kamo

Pagkahuman sa ilang pag-ihap

Nanago kami sa akong mga kauban

Kay dahunog na man

Among nadunggan.

Ngano man, nga ang mata sa katawhan

Anaa kanamo nga nagtago?

Unya ang uban usab

Gangisiha?

Hiay!* Ayha pa dayon namo nakita

Ang kaanyag ninyo sa ibabaw

Gihatagan ninyo og tingog

Ang kahilom

Gihayagan

Ang dulom.

Ingon pa sa dumagat*,

“Sama karon kamo kanila

Kamo ang sentro sa Kaamulan*”.

Ingon ko pa,

Es na*, dili!

Kami ang bituon sa kalangitan

Nga padayon og pagsidlak

Dili sama sa inyo

Nga igo ra

Galupad

Gabuto

Gakapalong. (Bukidnon News Literary Section)

 

Payirwerks*- korapsyon sa pulong nga fireworks.

Hiay!*– ekpresyon sa Higaunon sa pagkahimout .

dumagat*-tawag sa mga Lumad sa Bukidnon ngadto sa mga tawong langyaw nga namuyo sa ilang kayutaan.

Kaamulan*- usa ka kasaulogan sa panagtapok sa 8 ka tribo sa Bukidnon nga gaipahogayon matag tuig sa Malaybalay Bukidnon. Usa sa sumasalmot nga tribo niini ang Higaunon.

Es na*– ekpresyon sa Higaunon pagsupak o kaha dili pag-angy sa maong gisulti.

(Shem Linohon is a young Higaonon writer from Maluku, Manolo Fortich, Bukidnon. The Literary Section  is one of Bukidnon News’ newest sections to provide alternative avenue for Bukidnon’s home-grown creative writers.  Send your contributions to  anijunmudanudan@yahoo.com. In the subject line, write: literary section.)